Առաջարկում ենք պատրաստել համեղ կարկանդակներ յուրահատուկ բաղադրատոմսով։ Խմորն ուղղակի հալվում է բերանում, իսկ որպես միջուկ՝ կարելի է օգտագործել ցանկացած մթերք, որն առավել ձեզ դուր կգա։ Այս կարկանդակները կարելի է համտեսել թե՛ ճաշին, թե՛ ընթրիքին։ Հարմար է նաև որպես նախաճաշիկ դպրոցում։ Պատրաստման գործընթացը բարդ չէ, իսկ բաղադրիչներն էլ շատ չեն։
Անհրաժեշտ է՝
Խմորիչ — 1 թ․գ․
Կաթ — 250 մլ
Շաքարավազ — 0,5 թ․գ․
Աղ — 0,5 թ․գ․
Հավկիթ — 3 հ․
Ալյուր — 300 գ
Սոխ — 1 միջին չափի
Գազար — 1 միջին չափի
Կաղամբ — 400 գ
Խմորիչը մի քանի ճաշի գդալ կաթի հետ խառնել և 20 րոպե դնել մի կողմ։ Շաքարավազ, աղը և երկու հավկիթները (մեկը նախատեսված է կարկանդակների երեսին քսելու համար) հարել, լցնել կաթը,ապա խմորիչային խառնուրդը։ Ալյուրը լցնել այնքան, որ ստացվի փափուկ և չկպչող խմոր։
Ծածկել և դնել մի կողմ։ Մինչ խմորը կբարձրանա, այդ ընթացքում պատրաստել միջուկը։ Պատրաստել սոխարած, վրան լցնել քերած գազարը, տապակել, ապա բարակ կտրատած կաղամբը, տապակել։ Ավելացնել աղ, պղպեղ և վերջ։ Հասունացած խմորից ստանալ միջին չափի գնդիկներ։
Դրանք գրտնակի օգնությամբ բացել, դնել միջուկը և տալ եռանկյունու տեսք։ Դասավորել նախապես յուղաթղթով նախապատրաստած ձևամանի մեջ, վրան քսել ձվի և կաթի խառնուրդ, ապա թխել 180 աստիճան տաքացված ջեռոցում՝ մինչ վարդագունելը։
