Քանի դեռ օրերը ցուրտ են, և թեյախմությունն անչափ մեծ հաճույք է պատճառում, բաց մի թողեք առիթը։ Բաղադրատոմսը, որը ներկայացնում ենք ձեզ անչափ հեշտ է և պարունակում է հասանելի բաղադրիչներ։
Արդյունքում կստանաք անչափ նուրբ թխվածքաբլիթներ, որոնք ուղղակի հալվում են բերանում։ Այն կդառնա ձեր սիրելին։ Համեղ է թե՛ սուրճի, թե՛ թեյի հետ։
Անհրաժեշտ է՝
Ալյուր — 200 գ
Հավկիթ — 1 հ․
Շաքարի փոշի — 100 գ
Բուսայուղ — 100 մլ
Աղ — 1 պտղունց
Վանիլին — 0,5 թ․գ․
Փխրեցուցիչ — 0,5 թ․գ․
Այս անչափ հասարակ, բայց շատերի կողմից սիրված թխվածքաբլիթները պատրաստվում են հետևյալ կերպ․ հավկիթի վրա լցնել շաքարի փոշին, ապա հերթով հավելել մյուս բոլոր բաղադրամասերը և լավ հարել հատուկ հարիչ-գդալի օգնությամբ մինչ կստացվի համասեռ, մածուցիկ զանգված, ապա լցնել ալյուրը և լավ հունցել, ստանալ փափուկ, ձեռքերին չկպչող խմոր։
Այնուհետև պոկել փոքրիկ կտորներ և տալ թխվածքաբլիթի տեսք։ Դասավորել յուղաթղթով նախապատրաստած ձևամանում և թխել 10 ր 180 աստիճան տաք ջեռոցում։
