Սիրված դերասանուհի Մարգարիտա Խաչատրյանը նշում է ծննդյան հիսուներկուամյակը: Դերասանուհին ծնվել է Չարենցավանում: Դպրոցական կրթությունից հետո սկսվել է նրա թատերական կրթության շրջափուլը:
Տարբեր տարիների նա մեծանուն հայ վարպետների մոտ է ուսանել թատերական, դերասանական վարպետություն: Ուսանել է Ալ. Ծատուրյանի, Ա. Էլբակյանի, Հ. Ղափլանյանի և այլ մեծանուն անձանց մոտ: Հընթացս նա սկսել է նաև հանդես գալ ներկայացումներում տարբեր թատրոններում:
Թատերական, դերասանական ուսումնառությանը և մասնագիտական գործունեությանը զուգընթաց Մ. Խաչատրյանը նաև երգել ու երգում է:
Իննսունականների դժվարին ժամանակահատվածում նա մի շարք այլ երգիչների հետ շրջում էր մարզերում՝ մարզաբնակ քաղաքացիներին ուրախ պահեր պարգևելով:
Մ. Խաչատրյանը նաև տարատեսակ հեռուստանախագծերում է հանդես եկել, մանրապատումներում նկարահանվել:
Հատկանշական և հիշարժան է նրա մասնակցությունը Ա. Ղազարյանի հեղինակային մանրապատումներում, որոնք ժամանակին ամենից դիտված ու սիրված մանրապատումներն էին:
Միանալով գործընկերների և երկրպագուներին հնչեցրած շնորհավորանքներին ու բարեմաղթանքներին՝ մենք ևս շնորհավորում ենք դերասանուհուն՝ մաղթելով հագեցած ու բեղուն գործունեություն:
