Հազվադեպ կարելի է գտնել մարդ, որ չսիրի այս անուշեղենը։ Ահա բերել ենք սիրված Փախլավայի յուրօրինակ բաղադրատոմս, որը միշտ ստացվում է և անգամ սկսնակների մոտ։ Ճիշտ է, Փախլավայի պատրատման համար բաղադրիչները փոքր-ինչ շատ են և տարատեսակ, սակայն անզուգական համն արժե դրան։
Անհրաժեշտ է՝
Ալյուր — 800 գ
Թթվասեր — 400 գ
Կարագ — 300 գ
Դեղնուց — 3 հ․
Սոդա — 1 թ․գ․
Վանիլին
Միջուկի համար՝
Սպիտակուց — 6 հ․
Շաքարավազ — 300 գ
Ընկույզ — 600 գ
Զարդարելու համար անհրաժեշտ կլինի 3 դեղնուց և ընկույզ ինչքան որ կցանկանաք և վրան ծորացնելու համար 3 ճ․գ․ մեղրը 30 գ կարագի հետ հարած։
Ալյուրը և սառը կարագը ձեռքերով տրորել այնքան, մինչ կվերածվի մանր հանգույցների, ապա այս զանգվածին միացնել դեղնուցները։ Հավելել սոդան, վանիլինը և թթվասերը։ Հունցել այնքան, մինչ կստացվի էլաստիկ խմոր, գնդել և դնել սառնարանում մեկ ժամով։ Այդ ընթացքում պատրաստեք միջուկը․ սպիտակուցը, ընկույզը և շաքարավազը միախառնել և ստանալ համասեռ զանգված։
Սառնարանից դուրս բերել խմորը, բաժանել չորս հավասար մասերի, որոնք գրտնակով պետք է վերածել բարակ շերտերի։ Առաջին շերտը դնել ձևամանի մեջ, վրան հավասար փռել միջուկը, այնուհետև կրկին խմորային շերտ, ապա միջուկ մինչ ավարտը։ Վերջին՝ խմորային շերտի վրա քսել դեղնուց և դասավորել ընկույզները։
Ապա զգուշորեն կտրատել շեղանկյուններով և տեղափոխել ջեռոց՝ 200 աստիճան։ Պատրաստ կլինի 45 րոպեից։ Երբ կմնա յոթ րոպե մինչ պատրաստ լինելը, Փախլավան դուրս բերել, վրան ծորացնել կարագով հարած մեղրը և եփել ջեռոցում յոթ րոպե։
