Նիկոլ Փաշինյանի հայտարարությունն այն մասին, որ ՀԱՊԿ շրջանակներում առաջիկայում համատեղ զորք կուղարկվի Ղազախստան, իրական իրարանցում առաջ բերեց համացանցային հայկական տիրույթում։
Վարչապետի նման որոշման համար հիմք են հանդիսացել Ղազախստանի նախագահի դիմումը և այն փաստը, որ Հայաստանն այս տարի հանդիսանում է ՀԱՊԿ-ի նախագահողը։
Փաշինյանի համացանցային նման գրառումից զատ որոշման վերաբերյալ այլ մանրամասներ դեռևս հայտնի չեն։
Մի շարք քաղաքական և հասարակական գործիչներ նման մոտեցումը սխալ են համարում և գտնում են, որ Հայսատանը պետք է զերծ մնա Ղազախստանի ներքին գործերին խառնվելուց։ Այս մասին Դանիել Իոաննիսյանը նույնպես գրառում է կատարել։
Նա մասնավորապես գրել է․ «Որքան Սիրիա զորք ուղարկելն ու Լուկաշենկոյին արագի մեջ շնորհավորելն «օգնեց» Հայաստանի դաշնակցային հարաբերությունների ամրապնդմանը և միջազգային աջակցմանը, էնքան էլ Ղազախստան զորք ուղարկելը «կօգնի»։
Դե, ոնց «կօգնի»․ քաղաքակիրթ աշխարհն էլ ավելի շատ կհամոզվի, որ մենք իրենց հետ կապ չունեցող Ռուսաստանի անպրինցիպ կցորդ ենք` դրանից բխող հետևանքներով»։
