Աղցանները շատերի քիմքին են հարմար։ Դրանք վիտամիններով հագեցած են, քանի որ շատ օգտակար մթերքներ են պարունակում։ Դյուրամարս են և համադրվում են հիմնական ուտեստների հետ։ Աղցանների տեսակները բազմազան են և կարելի է պատրաստել ցանկացած մթերքների համադրությամբ։
Դրանց մեծ մասի բաղադրատոմսերը հորինվում են հենց պատրաստման պահին։ Այս նյութում ներկայացնում ենք մի աղցան, որը տեսակով յուրօրինակ է և օժտված անհավանական համով։
Անհրաժեշտ է՝
Հավկիթ — 5 հ․
Վարունգ — 5 հ․
Եգիպտացորեն — 1 բանկա
Կարտոֆիլ — 4 հ․
Խաշած տավարի միս — 2 ոչ մեծ կտոր
Մայոնեզ — 0,5 ճ․գ․
Թթվասեր — 1 ճ․գ․
Սխտոր — 1 ատամիկ
Աղ՝ ըստ ճաշակի
Կիտրոնի հյութ
Կարտոֆիլներն անցկացնել երկարավուն քերիչով և սառը ջրով լավ լվանալ, ջրքամել։ Խոհանոցային սրբիչի վրա չորացնել, ապա տապակել առատ բուսայուղում, ազատվել ավելորդ յուղից։ Մանրացնել և աղցամանի մեջ լցնել վարունգը, հավկիթը, սամիթը, սխտորը, միսը։
Միացնել տապակած կարտոֆիլին, լցել եգիպտացորենը, մայոնեզը, թթվասերը, հավելել աղը , կիտրոնի հյութը և միախառնել։ Ահա և վերջ, աղցանը պատրաստ է։ Կարող եք վայելել։
