Այսօր՝ դեկտեմբերի տասնչորսին, սիրված երգչուհի Սոնա Ռուբենյանի ծննդյան օրն է։ Սոնան այսօր դարձավ 29 տարեկան։ Օրվա առիթով կեսգիշերն անց երգչուհին համացանցային տիրույթում իր փոքրիկ հրաշքի հետ համատեղ լուսանկարներ է հանրայնացրել և նշանավորել օրը։
Երգչուհու համար այս տարեդարձը տարբերվող է, քանի որ առաջին տարեդարձն է, որ նա նշում է արդեն մայրիկի կարգավիճակում։
Սոնա Ռուբենյանը բեմում է հինգ տարեկանից։ Նա առաջին անգամ բարձրացավ բեմ «Կռունկ» մրցույթի ժամանակ և հիացրեց իր ձայնով։ Հինգամյա աղջնակի մոտ տաղանդն արդեն ցայտուն նկատելի էր։ 2012 թվականն էր, երբ Սոնան հայտնի դարձավ ավելի լայն շրջանակների։
Նա մասնակցեց «Հայ Սուպերսթար» երաժշտական մրցույթին և դարձավ հաղթող։ Սոնան մշտապես հանդես է եկել հիանալի ստեղծագործությունների կատարմամբ և շարունակում է ներկայացնել մեկը մյուսից գեղեցիկ և ճաշակով երաժշտություն։
Նա նաև հեղինակ է մի շարք երգերի։ Շնորհավորում ենք Սոնա Ռուբենյանին և լավագույնը մաղթում։
