Համավարակը շարունակում է մնալ համաշխարհային անհանգստության թեմա: Համավարակային իրականությունը դեռևս շեղել է համայն մարդկությանը համընդհանուր բնականոն կենսական հունից:
Ինչպես շատ երկրներում, Պաղեստինում ևս այս պայքարը շարունակվում է: Լրատվամիջոցներն այստեղի հիվանդանոցներից մեկում մի հետաքրքիր դեպքի են ականատես եղել:
Պաղեստինցի երիտասարդ Ջիհադա ալ-Սուվեյթի մայրը օրեր շարունակ համավարակային բուժում է ստանում հիվանդանոցներից մեկում: Երեսնամյա երիտասարդին, ինչպես ենթադրելի և հասկանալի է, բժիշկները թույլ չեն տալիս տեսակցել բուժում ստացող հիվանդ մորը:
Ամեն օր հիվանդանոցի բակ եկող երիտասարդն ի վերջո գտնում է մորը թեկուզ հեռվից տեսնելու ելքը: Ամեն օր նա գալիս ու պատի վրայով բարձրանում է հիվանդանոցային պատուհանի վրա: Նստելով պատուհանագոգին՝ Ջիհադա ալ-Սուվեյթը հետևում է իր մոր բուժման ընթացքին:
Վերջերս այս հուզիչ պատմությունը ցավալի ելք ունեցավ: Պաղեստինյան լրատվամիջոցները հայտնում են, որ տղայի մայրը համավարակի դեմ պայքարում անկարող է գտնվել ու մահացել է: Այս սրտառուչ պատմությունը հուզել է շատերին:
