Հայկական գաթան դարեր ի վեր հայ ընտանիքի սեղանի զարդն է։ Չկա մի տոնակատարություն, որի խնջույքի սեղանին չլինի այս անուշեղենը։ Այն հավանում են նաև օտարները։
Դա է վկայում Գեղարդի շուկայի հերթը, որտեղ զբոսաշրջիկները անհամբեր սպասում են իրենց հերթին, որպեսզի գնեն գաթա։ Առաջարկում ենք այն պատրաստել մեր բաղադրատոմսով և համոզված եղեք չեք փոշմանի։
Անհրաժեշտ է՝
Խմորի համար՝
2 հատ հավկիթ
500 գ մածուն կամ թթվասեր
300 գ կարագ
5 -6 բաժակ ալյուր
1 թ․գ․ սոդա
1 թ․գ․ վանիլին
Խորիզի համար՝
1,5 բաժակ շաքարավազ
1 բաժակ ալյուր
4 ճ․ գ․ բուսայուղ
Վանիլին
Առաջին հերթին պատրաստեք խորիզը։ Մաղած ալյուրին ավելացնել շաքարավազը, վանիլինը, բուսայուղը։ Այնուհետև ձեռքերի օգնությամբ խառնել այնքան, մինչ զանգվածը կվերածվի փշրանքների։
Խմորի համար մաղել ալյուրը և ավելացնել կարագ, ապա ձեռքերով տրորել այնքան, մինչ զանգվածը կդառնա համասեռ։ Առանձին տարայում հարել հավկիթները, վրան լցնել մածունը, վանիլինը, լավ խառնել, որից հետո լցնել ալյուրի վրա և հունցել ձեռքերին չկպչող խմոր։ Ծածկել և թողնել 30 ր․, որից հետո բաժանել չորս մասի։
Յուրաքանչյուր մասը գրտնակով մի փոքր բացել , կենտրոնում լցնել խորիզը, ապա հավաքել եզրերն ու ամրացնել, տալ գեղեցիկ կլոր տեսք, վրան քսել հարած հավկիթ, պատառաքով նախշեր անել ։ Թխել 220 աստիճանով տաքացված ջեռոցում մինչև ոսկեգունելը։
