Երեկ մեկնարկած Տեղեկատվական տեխնոլոգիաների համաշխարհային համագումարին ներկա գտնվելու նպատակով Հայաստանում է հայազգի գործարար, «Reddit» կայքի համահիմնադիր Ալեքսիս Օհանյանը։ Լրագրողների հետ զրույցում նա նշել է, որ Հայաստանն իր տունն է․ «Ուրախ եմ տուն վերադառնալ: Անհամբերությամբ սպասում էի այս համագումարին։ Ամեն ինչ հիանալի է։ Հիանալի ժամանակներում ենք ապրում, երբ համացանցը բազում հնարավորություններ է բացում մարդկանց առջև։ Մենք՝ հայերս, գնահատում ենք շախմատը և դպրոցում սովորեցնում են շախմատ խաղալ, ինչը ծրագրավորում սովորելու համար լավ հիմք է։ Ծրագրավորումը, իր հերթին, ժամանակակից աշխարհի մեծագույն ուժն է»:
Ալեքսիս Օհանյանը ցանկանում է ներդրումներ կատարել Հայաստանում․ «Չափերով փոքր, բայց ուղեղներով մեծ երկիր է Հայաստանը։ Պետք է շարունակենք ներդրումներ կատարել տեխնոլոգիաներում՝ տնտեսությունը զարգացնելու համար։ Հայաստանում ներդրումներ կատարելու հնարավորություններ եմ փնտրում: Արդեն «Շախմատ» անվանմամբ կոնյակ եմ թողարկել, «Առանց թույլտվության» գիրք եմ գրել, որը թարգմանվել է հայերեն։ Շատ ծրագրեր ունեմ, որոնք ապագայում կիրագործեմ»,- նշել է Օհանյանը։
